ربنا يخليلى مامى ^_^
هتقولولى انتى بتقولى مامى ياختى كميلة , يابنتى ده انتى كبرتى دلوقتى ومبقاش ينفع تقولى يا مامى زى الصغيرين
هقولكوا ببساطة لا هى مامى وهتفضل مامى لانى مهما كبرت هرجع للطفولة مع مامى . يعنى عايزين تقولولى انكوا مبقتوش بتروحلها لما تبقوا مدايقين . حتى لو محكتلهاش اللى مزعلكوا , بس بتعدوا فى حضنها وتحسوا بالامان ولما تعييوا بتقلبوا بابى عايز مامى جانبه عشان هو تعبان
لو انتوا مش كدة يبقى انتوا بتضحكوا على نفسكوا عشان كلنا مهما كبرنا بنفضل صغيرين مع امهاتنا
انا عشان بقعد بالشهور بعيد عن مامى عشان انا بكون فى مصر وهى فى هنا فى الامارات
عارفين يعنى ايه اكون بعيد عن مامى واول لما بنزل من الطيارة بجرى عليها زى البيبى واحضنها وبفضل طول الفترة اللى قاعدة فيها هنا عاملة زى البيبى اللى ماشى ورا مامته عمالة ارغى واحكى كل حاجة بتحصل معايا حتى لو حاجات عبيطة بس بكون عايزة ارغى معاها على قد ما اقدر
ماهو ده الطبيعى اصل هى اكتر حد فى الدنيا دى كلها فاهمنى حتى لو مقولتلهاش هى بتكون عارفة , ده حتى لو حاولت اخبى حاجة هى بتحس بيا دى مامى يعنى ولازم تفهمنى
وياه بقى لما اكون عايزة انزل اجيب هدوم ولا حاجة , بحب اروح معاها هى ومش مع اى حد تانى هتقولوا عليا بيبى ماشى ومالو طالما مع مامى قولوا عليا اللى انتوا عايزنه , انا بحب اروح معاها ونكون انا وهى بس وهى عارفة ده عشان كدة لما بكون عايزة انزل اجيب حاجة بتاخدنى لوحدى عشان اجيب حاجاتى , ما اصل هى اللى عارفة الستايل بتاعى وبعدين حقى ادلع على مامتى
ربنا يخليكى ليا يا مامى , ما انا اصل مش عارفة انا ممكن اقعد من غيرك ازاى اصلى بحبك بجد اكتر حاجة فى الكون يمكن مش بقولهالك كتير ده انا حتى نادرا لما بقولك بحبك بس انا عارفة انك بتحسيها ما انتى عارفة اللى بحسوا من غير مااقولهالك فى كلام
و صحيح اديني بقولك من دلوقتي انا هفضل بيبي معاكي مهما كبرت . مانا لو مش هدلع عليكي هدلع على مين, ما انت اللي عمرك ما هتسبيني و علطول هتدلعيني
و اهم حاجة بقى اقولهالك " انا بحببببببببببك و ربنا يخليكي ليا . يا احلى و اجمل ام فى الدنيا دى
No comments:
Post a Comment